Poor, migrant, vulnerable

కూలి బతుకులు నాలి బతుకులు
జోలి బతుకులు కాలే బతుకులు
శాపాల బతుకులు వాలిపొయే బతుకులు

రెక్కాడితేగాని డొక్కాడని బతుకులు
పక్క దొరకని బిక్క బతుకులు
అంతుచిక్కని బక్క బతుకులు

నడిరోడ్డు మీద దిక్కుమొక్కంటూ లేని బతుకులు
రైలుపట్టాలమీద చెట్టపట్టాలుగా చచ్చే  బతుకులు
వాహనలకింద పురుగుల్లా నల్గిపొయే బతుకులు  

బతుకు బరువైనా చావలేక బతికే బతుకులు
రేపుంటామో లేదో తెలియని బతుకులు
రామాకృష్ణాదులు అక్కరకు రాని బతుకులు  

ఎండకు మలమల మండె బతుకులు
ఆకలికి వలవల లాడె బతుకులు
కలకాలం కలకలంతొ బతికే బతుకులు

గవర్నమెంటు మెసేజీలతో పనిలేని బతుకులు
ఏ జీడీపీలు ఏ ప్యాకేజీలు ఆదుకోని బతుకులు
లాకప్పో లాక్డౌనో మరేంటో తెలియని బతుకులు  

నలత బతుకులు కలత బతుకులు  
అతుకుల గతుకుల బతుకులు
రోజువారీ బతుకులు వలస బతుకులు